ສ້າງແຊັດບອດ Facebook ເພີ່ມຍອດຂາຍ ດ້ວຍ 5 ເຕັກນິກການຕະຫຼາດທີ່ໄດ້ຜົນ
ໃນຍຸກທີ່ການແຂ່ງຂັນຂອງທຸລະກິດອອນລາຍສູງຂຶ້ນເລື້ອຍໆ ການນຳເຕັກໂນໂລຊີຢ່າງແຊັດບອດມາປະຍຸກໃຊ້ໃນການເຮັດການຕະຫຼາດ ຈຶ່ງກາຍເປັນອີກໜຶ່ງກົນລະຍຸດສຳຄັນທີ່ຊ່ວຍເພີ່ມປະສິດທິພາບໃນການເຂົ້າເຖິງລູກຄ້າ ສ້າງການມີສ່ວນຮ່ວມ ແລະ ກະຕຸ້ນໃຫ້ເກີດການຊື້ສິນຄ້າໄດ້ຫຼາຍຂຶ້ນ
ມື້ນີ້ພວກເຮົາຈະພາທຸກຄົນໄປຮູ້ຈັກກັບ 5 ເຕັກນິກການຕະຫຼາດຜ່ານແຊັດບອດ Facebook ທີ່ໄດ້ຜົນ ທີ່ຈະຊ່ວຍໃຫ້ແບຣນ ຫຼື ຮ້ານຄ້າຂອງທ່ານດຶງດູດລູກຄ້າ ແລະ ເພີ່ມຍອດຂາຍໄດ້ຢ່າງເຫັນຜົນຊັດເຈນ
1. ສົ່ງຂໍ້ຄວາມຕ້ອນຮັບອັດຕະໂນມັດ ພ້ອມໂປຣໂມຊັນພິເສດ
ເມື່ອມີຄົນເຂົ້າມາຢ້ຽມຊົມເພຈ Facebook ຂອງທ່ານ ສິ່ງທຳອິດທີ່ແຊັດບອດຄວນເຮັດແມ່ນການສົ່ງຂໍ້ຄວາມທັກທາຍຕ້ອນຮັບ ພ້ອມແນະນຳແບຣນ ແລະ ສິນຄ້າເບື້ອງຕົ້ນ ເພື່ອສ້າງຄວາມປະທັບໃຈໃນການຢ້ຽມຊົມຄັ້ງທຳອິດ
ນອກຈາກນີ້ ຍັງສາມາດແນບຮູບພາບສິນຄ້າ ຫຼື ໂປຣໂມຊັນພິເສດ ເຊັ່ນ ສ່ວນຫຼຸດສຳລັບລູກຄ້າໃໝ່ ເພື່ອຈູງໃຈໃຫ້ເກີດການຊື້ງ່າຍຂຶ້ນ ແລະ ມີເຫດຜົນທີ່ຈະກັບມາຢ້ຽມຊົມເພຈອີກໃນອະນາຄົດ
2. ໃຊ້ແຊັດບອດເປັນຜູ້ຊ່ວຍຂາຍ ຕອບຄຳຖາມ ແລະ ແນະນຳສິນຄ້າ
ນອກຈາກທັກທາຍຕ້ອນຮັບແລ້ວ ແຊັດບອດຍັງສາມາດເຮັດໜ້າທີ່ເປັນ "ຜູ້ຊ່ວຍຂາຍສ່ວນຕົວ" ທີ່ຄອຍໃຫ້ຂໍ້ມູນ ຕອບຂໍ້ສົງໄສ ແລະ ແນະນຳສິນຄ້າທີ່ເໝາະສົມກັບຄວາມຕ້ອງການຂອງລູກຄ້າແຕ່ລະຄົນ
ພວກເຮົາສາມາດຕັ້ງຄຳຖາມເພື່ອເກັບຂໍ້ມູນຈາກລູກຄ້າ ເຊັ່ນ ງົບປະມານ ໄຊທີ່ຕ້ອງການ ຫຼື ສະໄຕລ໌ທີ່ມັກ ແລ້ວໃຫ້ແຊັດບອດປະມວນຜົນ ແລະ ແນະນຳສິນຄ້າທີ່ຖືກໃຈລູກຄ້າທີ່ສຸດ ຫຼື ສົ່ງລິ້ງໄປຫາແຄັດຕາລັອກສິນຄ້າທີ່ກ່ຽວຂ້ອງ ເພື່ອນຳໄປສູ່ການຕັດສິນໃຈຊື້ທີ່ງ່າຍ ແລະ ວ່ອງໄວຂຶ້ນ
3. ເກັບລີດລູກຄ້າອັດຕະໂນມັດດ້ວຍແບບຟອມຖາມຂໍ້ມູນ
ການມີຂໍ້ມູນຕິດຕໍ່ຂອງລູກຄ້າໄວ້ໃນມື ຖືເປັນສິ່ງສຳຄັນຫຼາຍໃນການເຮັດການຕະຫຼາດອອນລາຍ ເພາະຈະເຮັດໃຫ້ພວກເຮົາສາມາດສົ່ງຂໍ້ມູນຂ່າວສານ ໂປຣໂມຊັນ ຫຼື ຂໍ້ສະເໜີພິເສດໄປຫາລູກຄ້າໄດ້ຢ່າງກົງເປົ້າໝາຍໃນພາຍຫຼັງ
ແຊັດບອດສາມາດຊ່ວຍເກັບຂໍ້ມູນລູກຄ້າແບບອັດຕະໂນມັດ ຜ່ານການສ້າງແບບຟອມຄຳຖາມງ່າຍໆ ໃຫ້ລູກຄ້າສາມາດປ້ອນຊື່, ອີເມວ, ເບີໂທລະສັບ ແລະ ຂໍ້ມູນອື່ນໆ ໄດ້ສະດວກວ່ອງໄວ ເຊິ່ງຈະຊ່ວຍສ້າງຖານຂໍ້ມູນລູກຄ້າທີ່ມີຄຸນນະພາບ ເພື່ອນຳໄປຕໍ່ຍອດໃນແຄມເປນການຕະຫຼາດຕໍ່ໄປ
4. ແຈ້ງເຕືອນໂປຣໂມຊັນ ແລະ ສິນຄ້າໃໝ່ອັດຕະໂນມັດ
ອີກໜຶ່ງເຕັກນິກທີ່ຊ່ວຍກະຕຸ້ນໃຫ້ລູກຄ້າກັບມາຊື້ຊ້ຳ ແມ່ນການສົ່ງຂໍ້ຄວາມແຈ້ງເຕືອນໂປຣໂມຊັນພິເສດ ຫຼື ສິນຄ້າໃໝ່ທີ່ໜ້າສົນໃຈ ຜ່ານທາງແຊັດບອດຢ່າງສະໝ່ຳສະເໝີ
ພຽງນຳລາຍຊື່ລູກຄ້າທີ່ເຄີຍມີປະຕິສຳພັນກັບແຊັດບອດ ຫຼື ເຄີຍຊື້ສິນຄ້າໄປແລ້ວ ມາຕັ້ງຄ່າສົ່ງແຄມເປນແຈ້ງເຕືອນອັດຕະໂນມັດ ໂດຍອາດແບ່ງກຸ່ມລູກຄ້າຕາມຄວາມສົນໃຈ ແລະ ກຳນົດເນື້ອຫາໃຫ້ຖືກໃຈແຕ່ລະກຸ່ມ ເຊັ່ນ ກຸ່ມພະນັກງານອອບຟິດ, ກຸ່ມແມ່ມືໃໝ່ ເປັນຕົ້ນ
ການສົ່ງຂໍ້ຄວາມເຫຼົ່ານີ້ຈະຊ່ວຍເຕືອນໃຫ້ລູກຄ້ານຶກເຖິງແບຣນຂອງພວກເຮົາຢູ່ສະເໝີ ແລະ ກັບມາຊື້ສິນຄ້າໃໝ່ຢ່າງຕໍ່ເນື່ອງ
5. ໃຫ້ແຊັດບອດເຊື່ອມຕໍ່ກັບຊ່ອງທາງຂາຍອື່ນໆ
ສຸດທ້າຍນີ້ ຖ້າຮ້ານຄ້າມີຊ່ອງທາງຂາຍຫຼາກຫຼາຍນອກຈາກ Facebook ເຊັ່ນ LINE Official Account, ເວັບໄຊ ຫຼື ແອັບພລິເຄຊັນ ກໍສາມາດນຳ URL ຂອງຊ່ອງທາງເຫຼົ່ານັ້ນມາຝັງໄວ້ໃນການສົນທະນາກັບແຊັດບອດ
ເມື່ອລູກຄ້າສອບຖາມສິນຄ້າຈົນເກີດຄວາມສົນໃຈແລ້ວ ແຊັດບອດກໍສາມາດສົ່ງລິ້ງຕໍ່ໄປຫາໜ້າສິນຄ້າໃນຊ່ອງທາງຕ່າງໆ ເພື່ອໃຫ້ລູກຄ້າສາມາດໄປເບິ່ງລາຍລະອຽດເພີ່ມເຕີມ ແລະ ສັ່ງຊື້ໄດ້ທັນທີ ໂດຍບໍ່ຕ້ອງເສຍເວລາຊອກຫາໃໝ່ໃຫ້ຫຍຸ້ງຍາກ ນັບເປັນການເພີ່ມໂອກາດປິດການຂາຍໄດ້ອີກທາງໜຶ່ງ
ສະຫຼຸບ
ດ້ວຍ 5 ເຕັກນິກການຕະຫຼາດຜ່ານແຊັດບອດ Facebook ທີ່ກ່າວມາ ຈະຊ່ວຍໃຫ້ການເຮັດທຸລະກິດອອນລາຍຂອງທ່ານສາມາດເຂົ້າເຖິງ ແລະ ເຂົ້າໃຈລູກຄ້າໄດ້ດີຍິ່ງຂຶ້ນ ສາມາດໃຫ້ບໍລິການຕອບຄຳຖາມ ແລະ ແນະນຳສິນຄ້າໄດ້ຕະຫຼອດ 24 ຊົ່ວໂມງ
ແລະ ຍັງສາມາດສົ່ງໂປຣໂມຊັນສ່ວນຫຼຸດເພື່ອກະຕຸ້ນຍອດຂາຍແບບອັດຕະໂນມັດ ລວມທັງເກັບຂໍ້ມູນເພື່ອສ້າງຖານລູກຄ້າທີ່ມີຄຸນນະພາບ ແລະ ເຊື່ອມຕໍ່ໄປຫາຊ່ອງທາງຂາຍອື່ນໆ ໄດ້ຢ່າງລຽບລື້ນອີກດ້ວຍ
ເຖິງຈະເບິ່ງຄືວຸ້ນວາຍສັບສົນໃນຕອນທຳອິດ ແຕ່ເມື່ອໄດ້ລົງມືເຮັດ ແລະ ປັບໃຊ້ໃຫ້ເໝາະກັບທຸລະກິດຂອງຕົນເອງ ຮັບປະກັນວ່າຈະເຫັນການປ່ຽນແປງທັງຍອດຂາຍ ແລະ ຄວາມພໍໃຈຂອງລູກຄ້າ ທີ່ເພີ່ມຂຶ້ນຢ່າງເຫັນໄດ້ຊັດແນ່ນອນ